Frá ráðstefnunni í Dublin á Írlandi desember 2005.
Rannsóknir á MND/ALS
Það er liðin meira en öld síðan fyrsta lýsingin var gerð á MND af Dr. Jean-Martin Charlot. Meirihlutann af þessum tíma sem liðinn er síðan hafa menn verið vonsviknir yrir litlum framförum í rannsóknum á sjúkdómnum. Á undanförnum árum hefur hins vegar margt gerst sem eykur bjartsýni manna.
Á alþjóðaráðstefnunni hélt Dr. Christopher Shaw, sem er þekktur vísindamaður innan taugafræðinnar, ræðu um þær framfarir sem orðið hafa. Hann sagði að á seinasta áratug hefði meira gerst en öll árin 120 þar á undan samanlagt. Þá nefndi hann framfarir í lyfjaþróun, umönnun sjúklinga, stofnfrumurannsóknir, genarannsóknir, dýramódel til rannsókna og samvinnu meðal vísindamanna sem helstu ástæðu fyrir þeim byr sem rannsóknir á þessu sviði finna fyrir. Að eftir löng dimm ár sjáist loks ljós bera við sjóndeildarhring.
Annar vísindamaður Dr Neil Cashman frá Háskólanum í Toronto í Kanada segir að hlutirnir gerist hraðar nú en nokkru sinni fyrr. Hann segir fleiri vinna að rannsóknum á MND en áður hefur þekkst og meiri fjármunum sé varið til rannsókna. Ný tækni sem er falin í nýjungum í efnalíffræði og erfðalíffræði hafa stuðlað að auknum uppgötvunum ásamt aðferðum í taugalíffræði.
Ný tækni er oft nefnd sem helsta ástæða fyrir framförum. Dr Guy Rouleau, sem ásamt félögum sínum uppgötvaði tvö af þeim genum sem valda ættgengu MND, segir að nútímatækni geri mönnum kleift að skoða hluti sem ekki var hægt áður, þar á meðal klónun og forritun gena. Lykilatriðið er að rannsaka erfðaþáttinn og það getum við með tækninni. Fullkomnari tölvur, gagnagrunnar og bættari samskipti flýta mjög fyrir rannsóknarferlinu.
Dr. Nigel Leigh er annar þekktur vísindamaður innan rannsókna á MND en hann setti upp klíníska rannsókn sem gerð var á lyfinu Riluzole á sínum tíma. Hann segir að samhliða aðgengilegri samskiptaleiðum með netinu hafi skapast meiri samvinna milli vísindamanna, sérstaklega þeirra sem vinna að taugarannsóknum vegna þess að svipað ferli getur átt sér stað innan taugafrumanna hjá hinum ýmsu taugasjúkdóma. Það sem ávinnst við rannsóknir á einum taugasjúkdómi gagnast rannsóknum á öðrum taugasjúkdómi.
Ný tæki til rannsókna og framfarir í rannsóknum á MND laða að nýja vísindamenn að sögn Dr. Lucie Bruijn sem vinnur fyrir alþjóðasamtök MND félaga á sviði rannsókna. Hún segir þetta spennandi tíma fyrir alla sem vinna að málefnum MND, að núna búum við yfir tækjum sem við þurfum til að leita svara við mikilvægum spurningum. Hún fullyrðir að það hylli undir uppgötvunum á nýjum genum, nýjum módelum sem notuð eru við rannsóknirnar og fleiri lyfjarannsóknir á fólki. Hún segir að stofnfrumur verði notaðar á nýja vegu, ekki aðeins til þess að taka við af deyjandi frumum heldur einnig til þess að koma í stað heilbrigðra nágrannafruma.
Dr. Guy Rouleau fjallaði einnig um að það sé ekki hægt að halda áfram rannsóknum á þessum hraða án nægjanlegs fjármagns sem þurfi að vera stöðugt. Bæði vísindamenn og sterkir fjárfestar sjái nú hag í því að fjárfesta í rannsóknum á MND. Þeir sjái möguleikana á lækningu og finni þörf fyrir að leggja verkefninu lið.
Samantekt FG.